མཐིང་སྔོན་རལ་པ་ཕྱེད་ནི་ཟུར་ཕུད་ལྷག་མ་གཡས་གཡོན་རིང་དུ་འཕྱང་། །
མུ་ཏིག་དྲ་བས་ཐོར་ཅོག་བཅིངས་ཤིང་ཆུ་ཡི་ལང་ཚོས་མཛེས་པར་སྤུད། །
བཞིན་རས་དཀར་ལ་དམར་མདངས་འཚེར་ཞིང་རེག་ན་འཇམ་པའི་རེག་བྱ་སྟེར། །
ཆུ་སྐྱེས་བཞིན་དུ་སྐྱོན་གྱིས་མ་གོས་འདབ་སྟོང་པད་དཀར་བཞད་པའི་ཀློང་། །
མཁྱེན་པའི་སྤྱན་དཀྱུས་འཛུམ་པའི་མུད་ལ་ཇི་སྙེད་ཤེས་བྱའི་ཆོས་ཀུན་མཇལ། །
བརྩེ་བས་མ་ཡི་རྗེས་སུ་ཆགས་པའི་མཆུ་སྒྲོས་གེ་སར་དགོད་པའི་དབུས། །
ནུས་པའི་ལྗགས་ཀྱི་ཟེར་འབྲུ་ལས་སྐྱེས་ལེགས་བཤད་སྦྲང་རྩིའི་ཐིག་ལེ་ཡི། །
ལུས་ཅན་རྐང་དྲུག་བྱང་གྲོལ་མགྲོན་ལ་བསུ་བའི་མཚོ་བྱུང་ཡིད་འཕྲོག་མ། །
མཉེན་ལྕུག་འཁྲི་ཤིང་དལ་བུས་བསྐྱོད་བཞིན་འཇམ་མཉེན་ཕྱག་གི་འདུ་བྱེད་ཀྱི། །
སོར་མོས་རྡུང་པའི་རྒྱུད་སྟོང་སྒྲ་དབྱངས་སྙན་པར་རབ་སྒྲོག་དྲུག་བཅུའི་དབྱངས།།
སྐབས་གསུམ་པ་དང་དྲི་ཟ་ལ་སོགས་སུ་ཡི་རྣ་པར་སོང་བའི་མུད།།
དབང་པོའི་ཁམས་དང་མོས་པར་འཚམས་པ་ཆོས་ཀྱི་སྒྲ་ནི་ལེགས་པར་འདོམས། །
སྐུ་སྟོད་ལྷ་རྫས་སྲབ་འཇམ་ཡངས་པ་དུ་ཀཱུ་ལ་ཡི་གོས་བཟང་ཕག །
ལང་ཚོའི་མཚན་མ་ཟུང་གཅིག་འབར་བ་གང་གི་མིག་ལམ་སོང་བ་ཡི། །
ཆགས་ལྡན་ཚོགས་རྣམ་བདེ་བས་མྱོས་ཤིང་དུག་གསུམ་སྡུག་བསྔལ་ཞི་མཛད་མ། །
ཅི་འདོད་འགྲོ་བའི་རེ་བ་སྐོང་ཞིང་རྟག་ཏུ་དགྱེས་པའི་འཛུམ་བག་ཅན། །
སྟ་ཟུར་ངོས་ནི་ཅུང་ཟད་རྒྱས་ཤིང་པཉྩ་ལི་ཀའི་ཤ་ཐབས་མཛེས། །
འཇོ་སྒེག་ཉམས་ཀྱིས་རབ་ཏུ་འགྱིང་ལ་ཕྲ་ཞིང་ལྡེམ་པའི་སྐེད་སྐབས་ཅན། །
རྗེས་ཆགས་འགྲོ་ལ་བརྩེ་བའི་ཟུར་མིག་དུས་ཀྱི་རླབས་བཞིན་ཡོལ་བ་མེད། །
ཙོག་པུར་སྟབས་ཀྱིས་བརྒྱད་གཉིས་ལང་ཚོར་ཡིད་འོང་སྒེག་པའི་ཉམས་ཀྱི་མཛེས། །
དྲུག་བཅུའི་རྔ་སངས་མགྲིན་པར་འཁྲོལ་བས་ལྗོན་པའི་རྟ་མགོ་ཕག་ཏུ་ཡིབ། །
ལྷ་དང་ལྷ་མིན་དྲི་ཟའི་སྒེག་མོས་ཁྱོད་ལ་ཕྱོགས་ཀྱང་ མགོ་བོ་སྨད། །
གང་གི་མཚན་ཙམ་དྲན་པའི་མུད་ལ་ངག་གི་དབང་པོ་མཆོག་སྩོལ་བའི། །
ལྷ་མོས་བདག་ལ་དགྱེས་པའི་ཚུལ་གྱིས་ཟབ་གསལ་མྱུང་བའི་ཤེས་རབ་སྩོལ། །