༸གོང་ས་༸སྐྱབས་མགོན་རྒྱལ་བའི་དབང་པོ་སྐུ་ཕྲེང་བདུན་པ་བློ་བཟང་བསྐལ་བཟང་རྒྱ་མཚོའི་མཚན་ཞབས་རི་ཁྲོད་པ་ཤི་ལཱའི་མིང་ཅན་ནམ། མཚན་དངོས་སུ་ཚུལ་ཁྲིམས་རྒྱ་མཚོ་རུ་འབོད་པས། ཕྱག་རྡོར་སྤྲུལ་པ་གུང་རུ་ཤར་པ་ཆོས་རྗེས་མཛད་པའི་རྗེ་ཆོས་དབང་གྲགས་པའི་འཁྲུངས་རབས་རྒྱས་པ་ལ་གཏུགས་ཏེ་མཛད་པའི། སྐྱིད་ཤོད་ཞབས་དྲུང་མཆོག་སྤྲུལ་རིན་པོ་ཆེའི་འཁྲུངས་རབས་དང་འབྲེལ་བའི་བརྟན་བཞུགས་བྱིན་རླབས་མཆོག་སྩོལ་དུ་ངག་ལ་དབང་བསྒྱུར་བློ་བཟང་རྒྱ་མཚོའི་ཞབས། ཞེས་པ་སྐྱིད་ཤོད་ཞབས་དྲུང་ངག་དབང་བློ་བཟང་རྒྱ་མཚོ་ཞུ་བ་ཁོང་ནི། དྲུང་རམས་པ་བློ་བཟང་མཐུ་སྟོབས་ཀྱི་སློབ་མ་དང༌། རྒྱུད་སྨད་སྔགས་རམས་པ་ལྷུན་གྲུབ་དཔལ་འབར་གྱི་བླ་མ་ཡིན་འདུག་པ་ནི། སྐྱབས་རྗེ་ཕ་བོང་ཁ་བདེ་ཆེན་སྙིང་པོའི་གསན་ཡིག་ཏུ་སྐྱིད་ཤོད་ཞབས་དྲུང་ངག་དབང་བསྟན་འཛིན་འཕྲིན་ལས་ཀྱི་གསུང་འབུམ་གསན་པའི་བརྒྱུད་རིམ་དུ། དྲུང་རམས་པ་བློ་བཟང་མཐུ་སྟོབས། སྐྱིད་ཤོད་ཞབས་དྲུང་ངག་དབང་བློ་བཟང་རྒྱ་མཚོ་རྒྱུད་སྨད་སྔགས་རམས་པ་ལྷུན་གྲུབ་དཔལ་འབར། བཀའ་འགྱུར་བ་བློ་བཟང་ཐབས་མཁས་རྒྱ་མཚོ། ལྕགས་ར་སྤྲུལ་སྐུ་ངག་དབང་འཕྲིན་ལས་དཔལ་བཟང༌། བྲག་རི་ཁྱབ་བདག་བདེ་བའི་རྡོ་རྗེ་སོགས་བགྲངས་གནང་འདུག །

རྩོམ་པ་པོ། འབྲི་རུ་སྐལ་བཟང་རྒྱལ་མཚན།