མཁས་དབང་ཤར་ཆེན་ནམ་མཁའ་རྒྱལ་མཚན། རྗེ་འདི་མདོ་སྟོད་སྒོམ་སྡེའི་ས་ཆར་ཆུ་ཕོ་འབྲུག་༡༥༣༢ལོར་སྐུ་འཁྲུངས། གཞོན་ནུ་ཉིད་ནས་རབ་ཏུ་བྱུང་ཞིང་རྡོ་རྗེ་འཛིན་པ་གོས་སྔོན་ཅན་གྱི་སྤྲུལ་པ་ཆབ་མདོ་ཆོས་རྗེ་པན་ཆེན་མི་གཡོ་བའི་དྲུང་དུ་ཕར་ཕྱིན་དང༌། དབང་རྗེས་གནང་མང་དུ་གསན། དེ་ནས་ཡུལ་དབུས་ཀྱི་ཆོས་གྲྭ་ཆེན་པོ་སེར་བྱེས་མཁས་སྙན་གྲ་ཚང་དུ་སྒྲིག་ཞུགས་ཀྱིས་པན་ཆེན་བདེ་ལེགས་ཉི་མར་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ། དཔལ་རྡོ་རྗེ་འཇིགས་བྱེད་དང༌། རྟ་མགྲིན་ཡང་གསང་ཁྲོས་པའི་དབང༌། རྒྱུད་འགྲེལ་དང་བཅས་པ་གསན། རྗེ་བཙུན་ཆོས་ཀྱི་རྒྱལ་མཚན་གྱི་དབུ་ཕར་འདུལ་གསུམ་ལ་མཁས་པར་སྦྱངས། གཙང་ཐོས་བསམ་གླིང་དུ་ཞུགས་ནས་འདུལ་མཛོད་ཚད་མ་སོགས་ལ་སྦྱངས་ཀྱང་ཐུགས་མ་ཁེངས་པར་རྗེ་བཙུན་པའི་དངོས་སློབ་ཨེ་པ་དཀའ་ཆེན་ཤེས་རབ་རྒྱལ་པོའི་དྲུང་དུ་བྱོན་ནས་ཕར་ཚད་དབུ་གསུམ་དང་དྲང་ངེས་རྣམ་འབྱེད་སོགས་གསུང་རབས་རྣམས་ཀྱི་དཀའ་བའི་གནད་རྣམས་ཞིབ་ཏུ་གསན། དཔལ་འཁོར་བདེ་ཆེན་ལེགས་གྲུབ་གྲྭ་ཚང་གི་འཆད་ཉན་པ་མཛད། མཁས་པ་རྣམས་ཚོགས་པའི་དབུས་སུ་བཤད་པ་མཛད་པས་ཀུན་ཀྱང་རྗེ་འདིའི་མཁྱེན་རབ་རྣམ་དཔྱོད་ཀྱིས་ཡིད་འཕྲོགས་ནས་སྒོམ་སྡེ་ཀུན་མཁྱེན་ཞེས་པའི་སྙན་གྲགས་ཕྱོགས་ཡོངས་ལ་ཁྱབ་པར་མཛད། རྒྱུད་སྟོད་དུ་ཆོས་རྗེ་དཔལ་འབྱོར་རྒྱ་མཚོའི་དྲུང་དུ་གསང་འདུས་ཀྱི་རྒྱུད་འགྲེལ་ལེགས་པར་གསན། གཞན་ཡང་རྗེ་ཤཱཀ་རིན་པ། པན་ཆེན་རིགས་པའི་སེང་གེ ཐམས་ཅད་མཁྱེན་པ་བསོད་ནམས་རྒྱ་མཚོ་སོགས་དབང་ལུང་མན་ངག་གསན། སེར་བྱེས་མཁས་སྙན་གྲྭ་ཚང་གི་མཁན་ཁྲིར་ཕེབས་ཏེ་མཆད་ཉན་ལོ་ཁ་ཤས་མཛད། ཤིང་ཁྱི་ལོར་དཔལ་ལྡན་རྒྱུད་སྟོད་ཀྱི་ཁྲི་ལ་ཕེབས་ཏེ་འཕྲིན་ལས་རྒྱས། རིམ་པས་ཤར་རྩེའི་ཁྲི་ལ་ཕེབས་ཏེ་དབང་རྗེས་གནང་ལུང་མན་ངག་གི་མཛོད་ཕྱེས་ཏེ་མཁས་པ་རྣམས་པད་མོའི་མཚོ་ལ་ངང་མོ་བཞིན་དུ་འདུས་ནས་ཤར་གྱི་ཆོས་གྲྭར་འཚང་ག་བྱེད་དགོས་པ་བྱུང༌། རྗེ་འདི་ལ་སློབ་མ་ཡང༌། པན་ཆེན་བློ་བཟང་ཆོས་རྒྱན་སོགས་བསྟན་འགྲོའི་ཁུར་ཆེན་འདེགས་ནུས་པའི་བུ་སློབ་མང་དུ་བྱོན། དགུང་ལོ་རེ་གཅིག་པར་ཆུ་ཕོ་འབྲུག་གི་ལོའི་ཟླ་བ་བརྒྱད་པའི་ནང་མི་ཕམ་ཆོས་ཀྱི་མདུན་སར་གཤེགས་སོ། །ཁོང་གི་བརྩམས་ཆོས་ཀྱང༌། ཕར་ཕྱིན་སྤྱི་དོན་ཆེན་མོ། དབུ་མ་ལ་འཇུག་པའི་དགོངས་འགྲེལ་ཐར་འདོད་འཇུགས་ངོགས། འཇིགས་བྱེད་ཀྱི་སྨོན་ཊཱིཀ་རིག་འཛིན་ཀུན་དྭའི་དགའ་སྟོན། དགེ་སློང་གི་བསླབ་བྱ་ཚིགས་བཅད་མ། བྱང་ཆུབ་སེམས་འགྲེལ་གྱི་རྣམ་པར་བཤད་པའི་ཞར་བྱུང་འབྲུག་མི་ཕམ་པད་མ་དཀར་པོས་ཕྱག་ཆེན་གྱི་བཤད་སྦྱར་རྒྱལ་བའི་གན་མཛོད་ཅེས་པར་རྗེ་ཙོང་ཁ་པ་ལ་དགག་པ་མཛད་པའི་གསུང་ལན། མདོ་རྒྱུད་དུ་མའི་ཊཱི་ཀ་དང༌། ལྷ་བླའི་བསྟོད་པ་དང་ཆབ་ཤོག་སོགས་མང་དུ་བཞུགས་སོ། །

རྩོམ་པ་པོ། འབྲི་རུ་སྐལ་བཟང་རྒྱལ་མཚན།