འབྲི་རུ་ཞབས་དྲུང་བློ་བཟང་ཡེ་ཤེས་བསྟན་པའི་རྒྱལ་མཚན་མཆོག །ནགས་ཤོད་འབྲི་རུ་ཆུ་མ་གཞུང༌མཁར་སྔོན་གྱང་ཐེད་དུ་འབྱོར་པ་ཤིན་ཏུ་ཞན་པའི་དུད་ཁྱིམ་ཞིག་ཏུ་ཡབ་གཡང་སྐྱབས་དང་། ཡུམ་སྤྲང་མོ་སྙི་ལྷ་{གཡུ་ལྷ་}མའི་སྲས་སུ་སྐུ་གོང་པའི་ལུང་བསྟན་བཞིན་འཁྲུངས། སྐུ་འཁྲུངས་པའི་ནུབ་མོར་སྔར་བྱུང་མྱོང་མེད་པའི་གངས་ཆེན་པོ་ཞིག་བབས། ཕྱི་ཉིན་ཞོགས་པ་གཡམ་གུའི་(སྦྲ་ཆུང་)ཉེ་འཁོར་གངས་ཞུ་ནས་སྨུག་ཐིང་ངེར་ཡོད་པ་གྲོང་མི་ཚོས་མཐོང་སྐབས། དེ་རིང་ཞོགས་པར་སྤྲང་མོ་སྙི་ལྷའི་སྔ་ལང་ཞེས་ལབ་གླེང་སྣ་ཚོགས་བྱུང་། དེའི་ནུབ་མོར་ཆུ་སྣོད་ནང་གི་ཆུ་འོ་མར་གྱུར་པ་སོགས་ངོ་མཚར་བའི་ལྟས་དུ་མ་བྱུང༌། སྐུ་གཞོན་ནུའི་དུས་ནས་ཞང་ཞུང་ཆོས་དབང་གྲགས་པ་ངག་དབང་དགེ་ལེགས་བསྟན་པའི་རྒྱལ་མཚན་གྱི་ཡང་སྲིད་དུ་ངོས་འཛིན་གྱིས་གདན་ས་སྦུས་མདའ་རྣམ་རྒྱལ་དཔལ་འབར་གླིང་དུ་གསེར་ཁྲིར་མངའ་གསོལ། སེ་ར་ཐེག་པ་ཆེན་པོའི་གླིང་དུ་ཆོས་ཞུགས་གནང་ནས་ཡོངས་འཛིན་བཤེས་གཉེན་དམ་པ་ཚུལ་བཞིན་བསྟེན་ཏེ་ གཞུང་ལུགས་དགོངས་འགྲེལ་དང་བཅས་པ་ལ་གསན་བསམ་མཛད། དམ་པ་འདི་ཉིད་ཕྱི་ཚུལ་ལ་སྦྱངས་སྟོབས་ཀྱི་ཡོན་ཏན་དེ་ཙམ་མེད་ཚུལ་བསྟན་ཀྱང༌། སློབ་གཉེར་ཟིན་མཚམས་དགེ་བཤེས་ཀྱི་མཚན་རྟགས་གྲྭ་སྐོར་དམ་བཅའི་སྐབས། གདན་སའི་མཁས་དབང་སྟོང་ཕྲག་མང་པོའི་དབུས་སུ། བློ་གསལ་རིགས་པ་སྨྲ་བ་རྣམས་ཀྱིས་བཀའ་པོད་ལྔ྄འི་རྩ་འགྲེལ་གཞུང་དོན་དང་མཐུན་པའི་བརྒལ་རྟགས་ཀྱིས་རྟགས་གསལ་ཕུལ་བར། རྒྱལ་བའི་གསུང་རབ་དྲང་ངེས་ཀྱི་དགོངས་དོན་དང་མི་འགལ་ཞིང༌། གྲུབ་མཐའ་སོ་སོའི་བཞེད་ཚུལ་ཐ་དད་པའི་ཆ་ལེགས་པར་ཕྱེས་སྟེ། རང་ལུགས་ཀྱི་རིགས་པའི་འཛིན་མཚམས་མ་འཆུག་པའི་གསུང་ལན་ཐོགས་མེད་དུ་གནང་བས་སྙན་པའི་གྲགས་པ་ཕྱོགས་བཅུར་ཁྱབ། སྤྱིར་དམ་པ་འདི་ཉིད་གྲུབ་ཐོབ་ཀྱི་ཚུལ་གནང་ནས་ངོ་མཚར་བའི་སྒྲུབ་རྟགས་སྣ་ཚོགས་གནང་། འདི་ཉིད་མཐུ་སྟོབས་ནུས་པའི་ཆ་ལ་གསང་བདག་དངོས་དང་འདྲ་བ་ཞིག་སྟེ། སེམས་ཅན་ལ་གནོད་འཚེ་བྱེད་མཁན་གྱི་མི་དང་མི་མ་ཡིན་གྱི་མཐུ་ནུས་ཀྱི་དཔའ་བཅོམ་པ་ལ་མཆོག་ཏུ་མངའ་བ་ནི། ལོང་ཆུང་སོགས་ཀྱི་གཏམ་རྒྱུད་ངོ་མཚར་བ་ལས་ཤེས། དེ་ལྟ་བུའི་མཐུ་སྟོབས་ནུས་པའི་དཔལ་མངའ་བའི་དམ་པ་དེ་ཉིད་ཀྱིས་མཛད་པ་དང་འཕྲིན་ལས་མཐའ་ཡས་པའི་སྒོ་ནས་སྐལ་ལྡན་གྱི་གདུལ་བྱ་ཐར་ལམ་དུ་འགོད་པ་སོགས་མཛད་པ་མཐར་ཕྱིན་ཅིང་གང་གི་གདན་ས་སྦུས་མདའ་རྣམ་རྒྱལ་དཔལ་འབར་གླིང་དུ་དགོངས་པ་ཞི་དབྱིངས་སུ་གཤེགས། རྒྱས་པར་ཞང་ཞུང་པ་ཆོས་དབང་གྲགས་པ་སྐུ་ཕྲེང་རིམ་བྱོན་གྱི་རྣམ་ཐར་ཡིད་ཆེས་ཉི་གཞོན་འདྲེན་པའི་ངོ་མཚར་གཏམ་གྱི་ཤིང་རྟར་གསལ།།

རྩོམ་པ་པོ། འབྲི་རུ་སྐལ་བཟང་རྒྱལ་མཚན།