རྩོམ་པ་པོ། འབྲི་རུ་སྐལ་བཟང་རྒྱལ་མཚན།

ཀློང་རྡོལ་དུས་ཆེན་ནི་སེར་བྱེས་ལྷོ་པ་ཁང་ཚན་གྱིས་བོད་ཟླ་བཞི་པའི་ཚེས་གསུམ་ཉིན་སྲུང་བརྩི་ཞུ་བའི་དུས་ཆེན་ཞིག་ཡིན། སྤྱིར་དུས་ཆེན་ནམ་རྗེས་དྲན་ཞེས་པའི་སྐད་དོད་ཨ་ནུ་སྨྲྀ་ཏི་ཞེས་པ་ཨ་ནུ་རྗེས་སུ་དང་། སྨྲྀ་ཏི་ཞེས་པ་དྲན་པར་བསྒྱུར་ལ། ཨ་ནུའི་སྒྲ་ནི་དམན་པ་དང་ལྷག་པ་ལ་འཇུག་པ་གཉིས་ལས། སྐབས་འདིར་ལྷག་པའི་དོན་ཏེ། ཨ་ནུ་སྨྲྀ་ཏི་ཞེས་རྗེས་སུ་དྲན་པ་ལྷག་པར་དྲན་པའི་དོན་ལ་འཇུག །མདོ་ལས། ཨཱརྱ་བུདྡྷ་སྨྲྀ་ཏི། དྷརྨ་སྨྲྀ་ཏི། སང་གྷ་སྨྲྀ་ཏི། ཞེས་འཕགས་པ་སངས་རྒྱས་རྗེས་སུ་དྲན་པ་དང་། ཆོས་རྗེས་སུ་དྲན་པ། དགེ་འདུན་རྗེས་སུ་དྲན་པའི་མདོ་ལས་རིམ་བཞིན་གསུངས་པ་བཞིན། གལ་ཆེན་གྱི་བྱུང་བ་དང་མི་སྣ་གང་ཞིག་གིས་བྱས་པའི་རླབས་ཆེན་གྱི་མཛད་པ་ལ་དྲན་གསོའམ་རྗེས་དྲན་བྱེད་པའི་དུས་ཚེས་ཤིག་ལ་དུས་ཆེན་ཟེར་བ་བཞིན། མཁས་གྲུབ་བྱེ་བའི་ཁྱུ་མཆོག་གྲུབ་དབང་ཀློང་རྡོལ་བླ་མ་རིན་པོ་ཆེའི་མཛད་པ་འཕྲིན་ལས་ལ་རྗེས་དྲན་བྱེད་པའི་དུས་ཚེས་ཤིག་ལ་ཀློང་རྡོལ་དུས་ཆེན་ཞེས་ཟེར། འདིའི་སྐོར་སེར་བྱེས་ལྷོ་པ་ཁང་ཚན་གྱི་རྟེན་གཙོའི་གྲས་སུ་བཞུགས་པའི་ཀློང་རྡོལ་རིན་པོ་ཆེའི་སྐུ་བརྙན་གྱི་དབུ་ཞྭའི་སྐོར་ལ་མཚན་བརྗོད་པར་དཀའ་བ་རིགས་བརྒྱའི་ཁྱབ་བདག་འཁོར་ལོའ་མགོན་པོ་བཀའ་དྲིན་གསུམ་ལྡན་གྱི་བླ་མ་གནས་ལྔ་རིག་པའི་དབང་ཕྱུག་སྐྱབས་རྗེ་ཆོས་ལྡན་རིན་པོ་ཆེ་རྗེ་བཙུན་བློ་བཟང་རྒྱལ་བསྟན་འཇིགས་བྲལ་དབང་ཕྱུག་མཆོག་གི་དྲུང་དུ་དགེ་བཤེས་རྒྱལ་བསྟན་མཁས་གྲུབ་དང་ངེད་གཉིས་བཅར་སྐབས་འདིའི་སྐོར་བཀའ་འདྲི་ཞུས་པའི་ལན་དུ། ཀློང་རྡོལ་དུས་ཆེན་ནི་བོད་ཟླ་བཞི་པའི་ཚེས་གསུམ་ཉིན་ཁེལ་གྱི་ཡོད་རེད། དུས་ཚོད་འདི་ནི་ཀློང་རྡོལ་བླ་མ་རིན་པོ་ཆེས་སེ་ར་ལྷོ་པ་ལ་ཚོམས་ཇ་དྲུག་བཅུ་གཏན་འཇོག་གནང་བའི་ཉིན་མོ་དེ་རེད། འདིའི་ཉིན་ཚོམས་ཇ་ཞིག་བཏང་གནང་ནས་དེའི་ཕྱི་ལོ་ནས་ལོ་རེ་ལ་ཊཾ་དཀར་རེར་བརྩིས་པའི་ལོ་དྲུག་ཅུའི་རིང་ཚོམས་ཇའི་གཏོང་ཐེབས་ཊཾ་དཀར་དྲུག་བཅུ་ཐམ་པ་འཇོག་གནང་མཛད་པ་རེད། སྐབས་དེ་དུས་ཊཾ་དཀར་རེས་ཚོམས་ཇ་རེ་འདང་ངེས་ཡོད་པ་རེད། དུས་ཆེན་ཉིན་ཁང་ཚན་གྱིས་ཚོམས་ཇ་ཚོགས་ནས་ཀློང་རྡོལ་སྐྱབས་ཐོ་ཀློག་པ་དང་། ཀློང་རྡོལ་བླ་མ་རིན་པོ་ཆེའི་སྐུ་ཆས་རྣམས་ངོ་སྤྲོད་དང་འབྲེལ་མཇལ་ཁ་གཏོང་བ་དང་། སྐབས་དེ་དུས་ཀྱི་ཚོམས་ཇའི་མ་ཐེབས་ཊཾ་དཀར་བླུག་སྣོད་ཀོ་ཁུག་ནག་པོ་འདི་ཙམ་ཞིག་ཡོད་རེད་ཅེས་ཚོད་དཔག་བྱས་ན་མཐོ་གང་དང་སོར་གསུམ་གྱི་ཚད་ཙམ་ཕྱག་གིས་གྲུ་བཞི་ནར་དབྱིབས་ཀྱི་སྟངས་ཀ་མཛད་དེ་ངོ་སྤྲོད་གནང་སོང་། འདི་ནི་སྐྱབས་རྗེ་བླ་མ་རིན་པོ་ཆེའི་ཞལ་དྲོན་མོ་ནས་གང་ཐོས་པ་རྣམས་རང་བཟོས་མ་བསླད་པར་བཀོད་པའོ། །